ربيع المقطري

زبَـط حماري زبَـط
بِشِلّتـُه و الرهط
من بعد ما شرعنوا
للتافهين السقـط
موقِف حماري ركيك
مهما قشع او  ضرط
عيبُه الوحيد ما فهم
اللي لِـ خُـرجُه لشط
واللي بِحكـل النشم
خلى الوطاف إشتعط
لكن حماري حمار
مشى الطريق الغلط
ما فاق من سكرتُـه
ولا درى كيف سقط
من يوم شاف الحمير
يتناوبوا بالنقـط
حرّم و طلّق ثلاث
من مكلفه واشتحط
بكّـر معا خُبـرته
ببندقه و القِشَـط
حمار ينزق حمار
وحميرنا بالوسط
وحمار جالس ينوق
مسكين لقفه افترط
وحمار ماهوش حمار
يغرِف ابوها شِنـَط
شاف التحالف حمير
وباعنا بالزلـط
يا مشتري للذِمـَم
سِعـر الأوادِم هبَـط
باربع بُقـش تشتري
من العُدين لا بَـرَط
يا عيبتاه بالدقون
دقن الشيوخ إمتلط
والمسبحة تستجر
من ذنبنا المُختلَـط
قل للإمام الـتّـقي
دينك غلط في غلط
من يوم منتا دخلت
حلف الدشر والسقط
اصبحت من جِيزهُـم
ماشي بنفس النمط
ما دام و الفاجِـري
مِن رحمة الله قنَـط
لا دعوَتـُه مُستجاب
ولا فراجُـه هبـط
كُلما تِضـرّع فقيه
زاد البلى و السَـخَط
يا لائمي لا تلوم
وضع البلاد إختبط
والسافلين الغجـر
لما رأوا للرُبـط
اللي حلف لك يمين
واللي لوجهه شخط
قل للسراويل كما
يُصـدِّقـوا للفـوَط
حِلف الارامل سخيف
 فاشل بكل الخُطط
اربع سنين يلبُـجوا
وسط الجواني حمَط
يا برغلي لا تخاف
من هيمنات القطط
 خليك على مبدئك
حامي لأرضك فقط
واللي شِهنجم عليك
إمسح بِأمُـه البلـط

                             د/ربيع المقطري ؛؛