ربيع المقطري

من يوم باعوا الهواجس
والحرف اصبح مُلقّن
والمدح وسّح برجله
من حلْق شاعر مُهجّن
ايقنت ان الحقيقة
وسط المزاعم مُكفّن
مزّيت حرفي المُسقى
مِن نبْع هاجس  مُلحن
ما زاغ حِسّي ولا ضاع
ولا لباطل تمسكن
يا ويح حظ المقعي
اللي بغدري تفنّن
وامسى يُخنذي حباله
لِصيد حرفي تِمرّن
مش قهر لمّا تلاقي
سطور خالي من الفن ؟؟
والا تشوف التِملّاق
بكل حُجفة مُشوّن
والزور لابس مشدة
و الحق يمشي  مُخنّن
والصدق يقنح من الريب
والدجل واقش مُرخّن
العبد بطنه تُقرقِر
والحُر مُغله مُشطّن
سامر على قلعة  الجوع
ما قد شكى أو تِأنئن 
حازب بحزنه المُجّهي 
قانع بحظه المُكعنن
وااا قهر قلبي على من
فنتش بحرفُه المصوّن
وباع نفسه بقرشين
بكل مذهب تِلوّن
ينسي لِجارُه و عارُه
لقا تِغدّى و خزن
مثل المُخيّم  على قيش
يبني حياته على الظن

مسكين قلبي المتيم
بالعشق كم قد  تِصبّن
إن شاف طيفك تِبلهت
واذا تركته تِشهجن
الشوق ينبش شجونه
و البين منه تِمّكن
والحب ، لا سامح الحب
 داخل ضلوعي تِفرعن
يبات يحلب دموعي
من ضرع بُقري مُغسّن
الليل كله تناهيد
والفجر نورُه مُبطّن
والصبح حانب بِقشواش
ما يبزغ إلا بكوشن
يا شوق خلي الاماني
داخل شجوني مُكرتن
القلب عاده تِعافى
والجرح حتمة تِقشنن
يا ليت قبل المواجع
القلب هذا تِمعّن
ما كان ودّف بحبك
ولا بِحيدك تِكنّـن
لكن على قولة الناس
من جاور الخوف يأمن

                          د/ربيع المقطري ،،
11/10/2019