ربيع المقطري

ليلبوه و الليل دامس
والنجوم حولي وساوس
ليلبوه حرفي ضماري
هاجسي غير الهواجس
ليلبوه هات الصرادِد
البلاد غدرة ونامس
صاحبي واحد مُعرّص
مهرته زرع الدسائس
اعرفه واعرف طِباعُه
من زمان حق البعاسس
مرحمُه حادف لنفسه
ما جسر حتى يناهس
لو سمع قرحة طماشة
يختبي خلف المتارس
ليلبوه كم من مقعي
يقتلب بالليل فارس
هاجسي وينك مغيب
لا خبر عنك ولا حِس
بلِّغ  الدسمس و قلّه
البلاد كله دسامس
 تحسبوش انه مُوّدر
مقطري والراس يابس
ليلبوه و البلطجية
مِنّهم سبعين دانس
يدهجوا وسط الأوِدّه
والدقون مثل المكانس
قاتهم من نجد كربة
طحمروا كل المغارس
ليلبوه والكلب أنفع
للبلاد من الف حارس
والمفصع كم شفصِّع
كم شِجِس بالوحل غاطس
ليلبوه يا سوق الاثنين
قلتلك رابع و خامس
الطريق كله مُلغم
إسلُك الدرب المُعاكس
للاسف عادك موسح
بارجُلك ل اللُغم داعس
ليلبوه يا هوب دحمَس
للقلوب طيفك يلامس
الربوع زوبه يُبلهِت
ما تُلاقي به مؤانس
والسرق حوله يحوموا
مِن غباش وسط المدارس
يحجزوا الجازع رجالة
يخلسوه حتى الملابس
أصلهم من فين مدريش ؟
من تُحاكي ؟ من تُخافِس ؟
مو جرى وااا شيخ الاخدام
الكسب قاهِن ( طواهِس )
والعزيق بالصبل(  يسُهق )
والنمر بالحيد خائس
كلّما  زاد   التِلهداد
اغرزه قرنين بسابس
ليلبوه و الجوع يشمِط
والعصيد بالدست يابس
و الهوِر واصل مُلجِّج
والعزيز للجوع لابس
ما يذل نفسه لمخلوق
لو اكل حتى مداعس ،،

                       د/ربيع المقطري ،،،